ການຈັດສັນຄຸ້ມຄອງປ່າໄມ້ແບບຍືນຍົງ (ลาว)

ການຈັດການຄຸ້ມຄອງປ່າໄມ້ແບບຍືນຍົງ ໂດຍສະເພາະ ແມ່ນການຈັດການຄຸ້ມຄອງ ການນາໍໃຊ້ເຂດປ່າຜະລິດພາຍໃນຊຸມຊົນ ໃຫ້ມີຄວາມແບບຍືນຍົງ ຄຽງຄູ່ກັບການປັບປຸງການດຳລົງຊີວິດ ຂອງຊາວກະສິກອນໃນທ້ອງຖີ່ນ.

ໂຄງການຈັດການຄຸ້ມຄອງປ່າໄມ້ແບບຍືນຍົງ ໃນໄລຍະຂະຫຍາຍ ເປັນໂຄງການຊຸກຍູ້ ກ່ຽວກັບການຈັດການຄຸ້ມຄອງປ່າໄມ້ແບບຍືນຍົງ ຊື່ງໄດ້ລິເລີ່ມມາໄດ້ 3 ໄລຍະ. ໃນໄລຍະທຳອິດປີ ແມ່ນເລີ່ມຈັດຕັ້ງປະຕິບັດໂຄງການແຕ່ປີ 2003-2008 ມີຊື່ວ່າ Sustainable Forestry and Rural Development (SUFORD), ໃນໄລຍະທີສອງ ເລີ່ມຈັດຕັ້ງປະຕິບັດແຕ່ປີ 2009-2014 ເປັນໄລຍະສືບຕໍ່ງົບປະມານ ມີຊື່ວ່າ Sustainable Forestry and Rural Development Project – Additional financing (SUFORD AF), ໃນໄລຍະທີ່ສາມ ເລີ່ມຈາກປີ 2014-2017 ເປັນໄລຍະສືບຕໍ່ຂະຫຍາຍບັນດາກິດຈະກຳຂອງໂຄງການເດີມ ເຊິິ່ງມີຊື່ວ່າ Scaling up Participatory Sustainable Forest Management (SUFORD SU). ໂຄງການດັ່ງກ່າວໄດ້ຮັບການຄຸ້ມຄອງ ຈາກພາກລັດຖະບານ ໂດຍກົມປ່າໄມ້ ກະຊວງກະສິກຳ ແລະ ປ່າໄມ້ ເປັນເຈົ້າຂອງໂຄງການ ຊື່ງມີການຈັດຕັ້ງບໍລິຫານ ນັບແຕ່ຂັ້ນສູນກາງຈົນຮອດຂັ້ນທ້ອງຖີ່ນ ໂດຍຜ່ານຄະນະບໍລິຫານງານ ແລະ ຊີ້ນຳໂຄງການແຕ່ລະຂັ້ນເຊັ່ນ: ຂັ້ນສູນກາງ ໄດ້ແກ່ກົມປ່າໄມ້ ແລະ ບັນດາຜູ້ໃຫ້ທືນ; ຄະນະບໍລິຫານງານຂັ້ນແຂວງໄດ້ແກ່ ຮອງເຈົ້າແຂວງ, ເຈົ້າເມືອງ, ແລະ ບັນດາພະແນກການຕ່າງໆທີ່ກ່ຽວຂ້ອງ, ລົງສູ່ລະດັບຂັ້ນເມືອງ ໄດ້ມີການຈັດຕັ້ງຄະນະບໍລິຫານງານຂັ້ນເມືອງ ຊື່ງປະກອບດ້ວຍ ທ່ານຮອງເຈົ້າເມືອງເປັນຄະນະຜູ້ຊີ້ນຳຂັ້ນທ້ອງຖີ່ນ ພ້ອມທັງຄະນະຜູ້ປະສານງານ ຈາກຫຼາຍພາກສ່ວນພາຍໃນເມືອງເຂົ້າຮ່ວມເຊັ່ນ: ຫ້ອງການປົກຄອງເມືອງ, ຫ້ອງການກະສິກຳ ແລະ ປ່າໄມ້, ຫ້ອງການຊັບພະຍາກອນທຳມະຊາດ, ຫ້ອງການອຸດສາຫະກຳ ແລະ ການຄ້າ, ອົງການຈັດຕັ້ງມະຫາຊົນ (ແນວລາວສ້າງຊາດ, ສະຫະພັນແມ່ຍີງ). ໂດຍອີງໃສ່ ແຜນການຈັດຕັ້ງປະຕິບັດຂອງຂັ້ນສູນກາງ ແລະ ຜັນຂະຫຍາຍເປັນແຜນການປະຕິບັດ ແລະ ກິດຈະກຳຂອງຂັ້ນແຂວງ ແລະ ເມືອງ ຕາມລຳດັບ. ໂດຍຜ່ານ ກົມປ່າໄມ້ ສ້າງແຜນການຈັດຕັ້ງປະຕິບັດວຽກງານ ໂດຍການສົມທົບກັບຊ່ຽວຊານວິຊາການຂອງຝ່າຍລາວ ແລະ ຕ່າງປະເທດ ຈຳນວນໜື່ງ ທີ່ສະໜັບສະໜຸນໂດຍຜູ້ໃຫ້ທືນ ເພື່ອອອກແບບເປັນໂຄງການ, ແລ້ວສະເໜີຕໍ່ຄະນະບໍລິຫານງານຂັ້ນແຂວງ, ຂັ້ນເມືອງ ແລະ ລົງຈັດຕັ້ງປະຕິບັດບັນດາກິດຈະກຳຕ່າງໆ. ຈຸດປະສົງຂອງໂຄງການ ເພື່ອຄຸ້ມຄອງປ່າຜະລິດ ຄຽງຄູ່ກັບການປັບປຸງຊີວິດການເປັນຢູ່ ຂອງປະຊາຊົນທີ່ນຳໃຊ້ປະໂຫຍດຈາກປ່າຜະລິດ. ບັນດາກິດຈະກຳທີ່ໄດ້ຈັດຕັ້ງປະຕິບັດ ປະກອບມີ 2 ວຽກຫຼັກ ເຊັ່ນ: ການຄຸ້ມຄອງປ່າຜະລິດ ແລະ ການພັດທະນາຊີວິດການເປັນຢູ່ຂອງປະຊາຊົນ. ສຳລັບ ວຽກງານການຄຸ້ມຄອງປ່າຜະລິດ ປະກອບມີ ການສຳຫຼວດຈັດສັນປ່າ, ສ້າງແຜນທີ່ເຂດຂຸດຄົ້ນໝາຍຕົ້ນຕັດ; ສ່ວນວຽກງານການພັດທະນາຊີວິດການເປັນຢູ່ຂອງປະຊາຊົນ ລວມມີ ການສົ່ງເສີມເຕັກນິກກະສິກຳ-ປ່າໄມ້ ຫຼື Agro-forestry ແລະ ດ້ານການປູກພືດປະສົມປະສານ ຫຼື integrated farming system, ວຽກງານສົ່ງເສີມກອງທືນບ້ານ ໂດຍການສະໜອງທືນໃຫ້ບ້ານລະ 8,000 ໂດລາສະຫະລັດ ແລະ ການສົ່ງງເສີມວຽກເຮັດງານທຳ ເພື່ອລຸດຜ່ອນການຕັດໄມ້ທຳລາຍປ່າໄມ້. ນອກຈາກນີ້ ໂຄງການດັ່ງກ່າວ ຍັງໄດ້ຮັບການສະໜັບສະໜຸນທາງດ້ານທືນ, ເຕັກນິກວິຊາການ ແລະ ການຮ່ວມມືກັບລັດຖະບານ ແຫ່ງປະເທດຟີນແລນ (Finland), ທະນາຄານໂລກ (World Bank) ແລະ ໂຄງການການລົງທືນດ້ານປ່າໄມ້ (Forest Investment Programme). ຜ່ານການຈັດຕັ້ງປະຕິບັດໂຄງການ ເຫັນໄດ້ວ່າ ປະຊາຊົນໃນເຂດເປົ້າໝາຍຂອງໂຄງການ ມີຄວາມພໍໃຈສົມຄວນ ທີ່ໄດ້ມີການເຂົ້າຮ່ວມປະຕິບັດວຽກງານການຄຸ້ມຄອງປ່າໄມ້ແບບຍືນຍົງ ເພື່ອຮັກສາຊັບພະຍາກອນປ່າໄມ້ ແລະ ສີ່ງແວດລ້ອມ, ວຽກງານປ່າໄມ້ໄດ້ມີການສຳຫຼວດ ແລະ ໄດ້ເຄື່ອນໄຫວຕິດຕາມຕະຫຼອດເປັນແຕ່ລະໄລຍະ.